Ndryshe nga gruri që ka shënuar rënie, prodhimi i lulediellit këtë vit ka çmim të lartë.

Në Grabian të Lushnjës ka përfunduar korrja, por sfidë për fermerët mbetet shitja. Këtë e konfirmon, Shefki Çekja, i cili tregon se ka një prodhim prej 25 hektarësh, që po paketohet e bëhet gati për shitje. 

“Edhe pse ka çmim, prodhimi është shumë i ulët, sepse ka pasur defektin që në maj lulen, sikurse grurin, e zuri vrugu,” thotë fermeri.

Shefkiu tregon se një ndihmë e madhe për të janë dhe skemat subvencionale të qeverisë, për lëndën e parë dhe naftën. Por nga ana tjetër, ai i bëri thirrje autoriteteve përkatëse që të monitorojnë tregjet pasi ka abuzime nga ana e shitësve. 

“Askush nuk mund ta imagjinojë se çfarë heq fshatari që kur e mbjell, e rrallon, sa herë e gërmon me dorë tokën, do e kultivojë, do i hedhë plehrat, të cilat janë shumë shtrenjtë,” shton fermeri Çekja.

Mbi 1000 hektarë sipërfaqe mbillet me grurë, luledielli dhe misër në Grabian. Tokat e ish-kënetës së Tërbufit janë të varfra me lëndë ushqyese, ndaj fermerët prej disa dekadash janë kultivuesit kryesorë të foragjereve në vend.

/rtsh.al/