Për të gjithë ndërtuesit, personat të cilët kanë kryer investime në kundërshtim me ligjin, ose ndërtimet e tyre janë kryer nëpërmjet parave të krimit, duket se nuk ka asnjë perspektivë që ato t’i gëzojnë, pa u “hyrë gjemb në këmbë”.

Dy godina të konfiskuara nga shteti në Golem, 3 dhe 6 kate, nuk do të jenë më në funksion të turizmit, por do të jenë në funksion të shërbimit social dhe shëndetësor.  

Qeveria, bazuar në ligjin për pronat e paluajtshme të shtetit, me propozim të ministrit të Financave dhe Ekonomisë, vendosi sot zyrtarisht kalimin në përgjegjësi administrimi të Ministrisë së Shëndetësisë dhe Mbrojtjes Sociale, për Shërbimin Social Shtetëror, të objekteve “Godina nr. 1 (3 kate + 1 kat nëntokë)” dhe “Godina nr. 3 (6 kate + 1 kat nëntokë)”, të konfiskuara, për interes publik, me adresë njësia administrative Golem, Bashkia Kavajë.

Vendimi përcakton se autoriteti përfitues, duhet të aplikojë nëpërmjet sistemit “e-leje” për miratimin e lejes së zhvillimit, si dhe lëshimin e certifikatës së përdorimit.

Autoritetit përfitues, i ndalohet t’i tjetërsojë, t’u ndryshojë destinacionin apo t’ua japë në përdorim të tretëve objektet e përcaktuara sa më sipër.

Për zbatimin e këtij vendimi ngarkohen Ministria e Financave dhe Ekonomisë, Ministria e Shëndetësisë dhe Mbrojtjes Sociale, Shërbimi Social Shtetëror dhe Agjencia Shtetërore e Kadastrës.

/rtsh.al/ a.meta/