Kryetari i Partisë Demokratike të Rithemelimit, Sali Berisha ka paralajmëruar policinë dhe SHIK-un, se nëse dëmtohet qoftë dhe një protestues në protestën e 11 shkurtit, do të konsiderohet si i persekutuar politik. Persekutori, theksoi ai, do të përgjigjet dhe pas 30 vitesh.

“Paralajmëroj policinë dhe punonjësit e SHIK të mbajë qëndrim koreekt. Cdo protestues i dëmtuar do konsiderohet i persekutuar politik dhe persekutori do përgjigjet dhe pas 30 vitesh. Ndaj, paralajmëroj policinë, dhe punonjësit e SHIK, kini kujdes. Madje mos u fusni fare në turmë se në Shik po ndodh…ai po shkatërron institucionet”, tha Berisha.

Partia Demokratike e Rithemelimit, do të mbajë më 11 shkurt, ora 12:00 protestën për dorëheqjen e Kryeministrit Edi Rama. PD parashikoi se pjesëmarrja do të arrijë deri në 100 mijë protestues.

Protestuesit do të grumbullohen fillimisht në selinë e Partisë Demokratike, sheshin Nënë Tereza dhe sheshin Skënderbej për të vijuar më pas drejt Bulevardit Dëshmorët e Kombit. Ndërsa foltorja e PD do të vendoset përballë Kryeministrisë.

/rtsh.al/