Presidenti rus Vladimir Putin ka deklaruar se nuk ishte një sulm i jashtëm ai që rrëzoi avionin që transportonte komandantin e luftës Uagner, Evgeni Prigozhin (Yevgeny Prigozhin), por granata dore brenda avionit, duke hedhur poshtë kategorikisht spekulimet për një sulm me raketa.

Duke folur në Klubin e Diskutimit Valdai në resortin e Soçit, Putin zbuloi informimin që sipas tij mori pak ditë më parë nga kreu i Komitetit Hetues të Federatës Ruse. “Në trupat e viktimave të rrëzimit të avionit janë gjetur fragmente granate. Nuk ka pasur asnjë goditje të jashtme, kjo është e dokumentuar”, tha ai.

Prigozhin, i cili udhëhoqi një kryengritje të dështuar kundër Kremlinit, ishte në mesin e 10 personave në bordin e avionit privat që u rrëzua në një fushë në veriperëndim të Moskës në gusht ndërsa po udhëtonte për në Shën Petersburg. Të gjithë në bord, përfshirë Prigozhin dhe ndihmësit e tij kryesorë, humbën jetën.

Udhëheqësi rus, qeveria e të cilit ka mohuar përfshirjen në aksident, nuk detajoi se si mund të kishin shpërthyer granatat në aeroplan, por tha se sipas tij, hetuesit duhet të kishin kryer teste droge ose alkooli në trupat e viktimave./CNN

/rtsh.al/