Izraeli paralajmëroi të shtunën Iranin se do të përballet me pasojat nëse përpiqet të përshkallëzojë tensionet në Lindjen e Mesme. Kështu u shpreh zëdhënësi i ushtrisë izraelite Daniel Hagari. Ai bëri me dije se vendi i tij ka rritur nivelin e gatishmërisë për t’u mbrojtur nga agresioni i pritshëm iranian. 

Ndërkohë Irani thotë se Izraeli është në panik të plotë lidhur me përgjigjen e këtij vendi pas sulmit në Siri. “Izraeli nuk e di se çfarë do të bëjmë. Ky shtet dhe aelatët e tij janë të tmerruar nga përgjigjja hakmarrëse iraniane”-  u shpreh një këshilltar i udhëheqësit suprem të Iranit. Ai shtoi se lufta psikologjike, mediatike dhe politike është më e tmershme se sa vetë sulmi që pret çdo natë Izraeli. 

Ndërsa tensionet në rajon rriten, Garda Revolucionare e Iranit njoftoi të shtunën se sekuestroi një anije kontejenerësh pranë ngushticës së Hormuzit, që sipas saj i përkiste një biznesmeni izraelit. Sipas kompanive të sigurisë detare, anija me 25 anëtarë në bord u kap në brigjet e Emirateve të Bashkuara Arabe nga autoritetet iraniane. 

Teherani akuzon Izraelin dhe është zotuar të hakmerret për sulmin ajror të 1 prillit në Damask, i cili shkatërroi konsullatën e Iranit dhe i mori jetën 13 personave. Mes tyre ishin 7 anëtarë të Gardës Revolucionare të Iranit përfshirë edhe dy gjeneralë.
 
/ rtsh.al /