Rubrika Sportive në RTSH vjen edhe këtë javë me surpriza dhe të ftuar interesantë. Me “kryefjalë” javën e 24-t, në drejtimin e Hygerta Sakos dhe me të ftuarit të përhershëm në panel: Shkëlqim Muça, Fatmir Mëneri dhe Fation Shehu, sot priten edhe tema dhe të ftuar të tjerë.

Vllaznia lëshon për herë të parë kreun gjatë këtij sezoni dhe në vendin e saj është Laçi. Kjo është e para herë që kurbinasit kryesojnë Superioren në këtë fazë të kampionatit. 

Derbin Tirana – Partizani e fitojnë të kuqtë dhe në emisionin e sotëm do të jetë edhe Gazment Demi. Presidenti i Partizanit do të tregojë jo vetëm këndvështrimin e tij për derbin, por edhe cfarë po ndodh me Kompleksin Sportiv apo me objektivat.

Në studio gjithashtu do të jetë edhe Patrik Bardhi i Kastriotit. Talenti 22-vjeçar do të tregoj sezonin e tij me krutanët dhe planet për të ardhmen. Një tjetër talent, Redon Mihana vjen të flas për Apoloninë dhe barazimet e javëve të fundit, ku fierakët kanë ndalur Partizanin, Lacin dhe Kukësin.

Nuk do të mungojnë në mbrëmjen e sotme të gjitha kronikat e javës dhe momentet e diskutueshme, por rikthehet edhe materiali i humorit përgatitur nga Ngop Media për Rubrikën Sportive.