Liderët e vendeve që do të marrin pjesë në Samitin Ukrainë–Europa Juglindore kanë mbërritur në Pallatin e Kongreseve, ku do të zhvillohen punimet e ditës.

Ata janë pritur nga kryeministri Edi Rama dhe presidenti i Ukrainës, Volodimir Zelenski (Volodymyr Zelensky), si bashkorganizatorë të takimit.

Të pranishëm në Samit janë presidentja e Kosovës, Vjosa Osmani, presidenti i Maqedonisë së Veriut, Stevo Pendarovski, presidentja e Moldavisë, Maja Sandu, presidenti i Serbisë, Aleksandar Vuçiq, presidenti i Malit të Zi, Jakov Milatoviq, kryeministri i Kroacisë, Andrej Plenkovic dhe kryeministrja e Bosnjë-Hercegovinës, Borjana Kristo.

Disa prej liderëve të vendeve që nuk kanë mundur të jenë pjesë e Samitit, si presidenti i Turqisë, Rexhep Tajip Erdoan (Recep Tayyip Erdogan) dhe kryeministri i Greqisë Kiriakos Micotaqis (Mitsotakis) do të dërgojnë video mesazhe.

/rtsh.al/