Shtetet e Bashkuara të martën mbështetën pohimin e Tajvanit se ngushtica që ndan ishullin nga Kina është një rrugë ujore ndërkombëtare, një kundërshtim i mëtejshëm ndaj pretendimit të Pekinit për të ushtruar sovranitet mbi kalimin strategjik, njofton Reuters.

Ngushtica e Tajvanit ka qenë një burim i shpeshtë i tensioneve ushtarake që kur qeveria e mundur e Republikës së Kinës iku në Tajvan në vitin 1949 pas humbjes së një lufte civile me komunistët, të cilët themeluan Republikën Popullore të Kinës.

Vitet e fundit, anijet luftarake të SHBA-së dhe me raste ato nga vendet aleate si Britania dhe Kanadaja, kanë lundruar përmes ngushticës, duke tërhequr zemërimin e Pekinit.

Të hënën, Ministria e Jashtme e Kinës tha se vendi “ka sovranitet, të drejta sovrane dhe juridiksion mbi ngushticën e Tajvanit” dhe e quajti atë “një pretendim të rremë kur disa vende e quajnë ngushticën e Tajvanit “ujëra ndërkombëtare”.

Duke komentuar të martën, zëdhënësi i Departamentit të Shtetit të SHBA-së, Ned Price tha në një email për Reuters: “Ngushtica e Tajvanit është një rrugë ujore ndërkombëtare, që do të thotë se ngushtica e Tajvanit është një zonë ku liritë e detit të hapur, duke përfshirë lirinë e lundrimit dhe fluturimit, janë të garantuara nën kushtet e ligjeve ndërkombëtare.”

 Bota ka “një interes të qëndrueshëm për paqen dhe stabilitetin në ngushticën e Tajvanit dhe ne e konsiderojmë këtë thelbësore për sigurinë dhe prosperitetin e rajonit më të gjerë Indo-Paqësor”, shtoi Price.

Ai përsëriti shqetësimet e SHBA-së për “retorikën agresive dhe aktivitetin shtrëngues të Kinës në lidhje me Tajvanin” dhe tha se Shtetet e Bashkuara “do të vazhdojnë të fluturojnë, lundrojnë dhe operojnë kudo që e lejon ligji ndërkombëtar, dhe kjo përfshin kalimin tranzit përmes ngushticës së Tajvanit”.

 Më herët të martën, zëdhënësja e Ministrisë së Jashtme të Tajvanit, Joanne Ou e quajti pozicionin e Kinës një “gabim”.

Të mërkurën, kryeministri i Tajvanit, Su Tseng-chang tha se ngushtica nuk ishte “në asnjë mënyrë deti i brendshëm i Kinës”.

“Ambicia e Kinës për të gëlltitur Tajvanin nuk është ndalur ose nuk është fshehur kurrë; ngushtica e Tajvanit është një zonë detare për lundrim ndërkombëtar të lirë”, u tha ai gazetarëve.

Zyra e Çështjeve të Tajvanit të Kinës tha se qeveria në Taipei “po bashkëpunonte me forcat e jashtme për të nxitur çështjen”.

Kjo “dëmton interesat e bashkatdhetarëve në të dy anët e ngushticës së Tajvanit dhe tradhton interesat e kombit kinez – është e neveritshme”, tha zëdhënësi i zyrës Ma Xiaoguang në Pekin.

Kina kurrë nuk ka hequr dorë nga përdorimi i forcës për të vënë nën kontrollin e saj Tajvanin dhe e sheh ishullin si një pjesë të qenësishme të territorit kinez.

Tajvani thotë se Kina nuk ka të drejtë të flasë për të ose të pretendojë sovranitet, duke thënë se vetëm populli i Tajvanit mund të vendosë për të ardhmen e tij dhe se Republika Popullore e Kinës nuk ka kontrolluar kurrë asnjë pjesë të ishullit. (Sipas Reuters)