Dy persona janë arrestuar në Laç, pasi dyshohet se shpërndanin lëndë narkotike në doza, kryesisht në afërsi të shkollave.

Operacioni policor i koduar “Quick Strike 2” u finalizua nga Seksioni për Hetimin e Narkotikëve, në bashkëpunim me strukturat e tjera të Policisë së Lezhës dhe Komisariatin e Policisë Kurbin, në kuadër të planit operacional “Shkolla të Pastra”.

Në pranga ranë V. R., 23 vjeç, dhe A. Gj., 36 vjeç, të dy banues në Laç. Ata u kapën në flagrancë pranë një shkolle në qytet.

Gjatë kontrolleve fizike dhe në banesat e tyre, policia sekuestroi 126 doza të dyshuara narkotike, nga të cilat 113 me kanabis dhe 13 me kokainë. Gjithashtu, u gjetën municion luftarak dhe dy telefona celularë.

Nga hetimet paraprake dyshohet se dy personat ushtronin aktivitetin e shitjes së lëndëve narkotike në qytetin e Laçit, kryesisht pranë perimetrit të sigurisë së institucioneve arsimore.

Materialet procedurale i janë referuar Prokurorisë pranë Gjykatës së Juridiksionit të Përgjithshëm Lezhë për veprime të mëtejshme.