Prokuroria e Posaçme Antikorrupsion (SPAK) kërkoi të martën 2 vite e 6 muaj burg për kryebashkiakun e zgjedhur të Himarës, Fredi Beleri, për veprën e korrupsionit. 

Në seancë, dy prokurorët e SPAK-ut lexuan dosjen gati 100-faqëshe kundër Belerit dhe mikut të tij, Pandeli Kokaveshi, duke përsëritur akuzat se kanë përgjegjësi penale për blerjen e votave në zgjedhjet lokale të majit 2023.

Hetuesit kërkuan që edhe Kokaveshi të dënohet me heqje lirie, përkatësisht 2 vite, por dënimi do të konvertohet në shërbim prove për shkak të gjendjes së tij shëndetësore.

Por avokati i Belerit u shpreh se i gjithë procesi ndaj klientit të tij është manipuluar. “Nuk solli asnjë foto të vetme. Telefonat, pajisja DVR që janë sekuestruar nuk kanë asnjë lloj vlere. Ne i sollëm edhe dëshmitarin që ka qenë prezent. Prokurori i qëndron dëshmisë me fakte të pavërteta. Nuk ka gjurmë gishtash te kartëmonedhat,” u shpreh ai. 

Seanca e radhës për mbrojtjen është caktuar më 28 shkurt.

Hetimet ndaj Belerit nisën më 9 maj 2023 pas referimit të rastit nga policia e Vlorës, mbështetur në pamjet filmike dhe përgjimet e një agjenti të infiltruar të policisë, i cili kapi momentin kur bashkëpunëtorët e Belerit dhanë 40 mijë lekë në këmbim të 8 votave.

Në fjalën para pretencës, Beleri u shpreh se gjithë kërkesat e tij për ekspertim të provave, drejtësia nuk ia kishte lejuar.

“Ju, duke mos qënë dhe duke mos u sjellë asnjëherë si gjykatë e paanshme, pas kallëzimit tim cenuat dhe deformuat më tepër procesin gjyqësor ndaj meje. Ju në një vendim historik për paligjshmërinë, refuzuat lejen time për të bërë betimin. Duke u zgjedhur me kujdes si një trupë e posaçme për këtë ngjarje të posaçme, shkuat edhe më tej i thatë në vendim kryeministrit si të zgjidhë hallin e tij, pa qënë palë në proces… Ju shikoni prokurorin në sy, përpara se të shpreheni në lidhje me kërkesat e mia. Për ju nuk është e rëndësishme dhënia e drejtësisë, pasi duket qartë që ju nuk mundoheni as të duket sikur po jepni drejtësi. Për ju nuk është as e rëndësishme për të respektuar parimet kushtetuese të një procesi të rregullt ligjor, në asnjë aspekt të tij. Për ju është e rëndësishme që të plotësoni dëshirat dhe të zbatoni urdhrat e kryeministrit për të mbajtur peng Bashkinë e Himarë. Në këto kushte një pjesë e prokurorisë dhe Kryeministri besojnë te drejtesia juaj. Ata janë të vetmit tashmë që besojnë dhe thonë që kjo është histori e Belerit me drejtësinë,” u shpreh Beleri.

Në zgjedhjet për Bashkinë e Himarës në maj të vitit të kaluar,  Fredi Beleri ka fituar 3837 vota në total, kundrejt 3818 vota që ka fituar Jorgo Goro. 

/rtsh.al/