Ndërtesat pothuajse të gjitha të rrënuara, kudo shihen të plagosur pa asnjë vend ku të strehohen të sigurt ndërsa një kishë e vogël ajo e Shën Filipit, në veri të Gazës ka hapur dyert për të plagosurit.

Ndërtesa të copëtuara prej betoni dhe të hedhura në erë rrethojnë muret e bardha dhe dritaret rozë me xham me njolla të kishës, e cila është kthyer në një repart të improvizuar urgjence për palestinezët e plagosur në ofensivën ushtarake të Izraelit.

Një prej tyre bën thirrje për ndihmë. “I bëj thirrje të gjithë botës që të më ndihmojë të dal (nga Gaza) për të marrë një gjymtyrë artificiale për këmbën time, unë nuk mund të qëndroj më kështu”, tha ai për CNN të martën.

Javët e fundit, ushtria izraelite shtoi sulmet ajrore në pjesë të Gazës qendrore dhe veriore. Familje të tëra janë vrarë dhe strehimoret e shpërnguljeve janë rrafshuar.

Qindra mijëra civilë të zhvendosur që dikur gjetën strehë në spitale tani janë sërish në arrati  pasi objektet mjekësore në të gjithë enklavën janë shtypur nga bombardimet ose rrethohen.

Më në jug, në Rafah, disa civilë po nxitojnë drejt veriut përpara një ofensive tokësore të parashikuar izraelite. Disa palestinezë i thanë CNN se nuk ka paqe mes rrënojave.

Izraeli filloi ofensivën e tij ushtarake pas sulmeve të 7 tetorit të udhëhequr nga Hamasi në jug të Izraelit, të cilat vranë rreth 1200 njerëz. Sulmet izraelite në Gaza kanë vrarë të paktën 29,313 palestinezë dhe kanë plagosur 69,333 të tjerë, sipas Ministrisë së Shëndetësisë në Gaza.

Bombardimet e Izraelit dhe kufizimet e ashpra për ndihmat që hyjnë në brez kanë zvogëluar ushqimin, karburantin, ujin dhe furnizimet mjekësore, kanë shkatërruar sistemin e kujdesit shëndetësor dhe kanë ekspozuar të gjithë popullsinë prej më shumë se 2.2 milionë njerëzve ndaj zhvendosjeve masive dhe sëmundjeve vdekjeprurëse .

Që nga 14 shkurti, vetëm 11 nga 36 spitale në Gaza funksionojnë pjesërisht , ndërsa tre janë në funksionalitetin minimal, sipas organizatës humanitare Ndihma Mjekësore për Palestinezët.

/rtsh.al/