Presidenti i Shteteve të Bashkuara, JoeBiden, ka zhvilluar një bisedë telefonike me Presidentin turk, Recep Tayyip Erdogan, njoftoi Shtëpia e Bardhë. Ky është komunikimi i parë i drejtpërdrejtë midis udhëheqësve të dy vendeve aleate të NATO-s, raportet e të cilave janë dobësuar shumë. Telefonata e shumëpritur ndodhi mbi tre muaj pas inaugurimit të Bidenit, një sinjal se ai nuk do të mbajë të njëjtin kurs ndaj udhëheqësit turk, sikurse paraardhësi i tij DonaldTrump. Më 24 Prill, në Ditën Përkujtimore të masakrës ndaj armenëve, Biden pritet të deklarojë se vrasja dhe dëbimi i tyre në Perandorinë Osmane më 1915 ishte genocid. Agjencia e lajmeve Reuters, duke ju referuar burimeve të saj, raportoi se Biden i ka bërë me dije Erdoganit se e ka në plan të njohë masakrën ndaj armenëve si genocid. Por, në njoftimin e Shtëpisë së Bardhë kjo çështje nuk u përmend. “Presidenti Biden bisedoi me Presidentin turk, Recep Tayyip Erdogan, dhe tregoi interesin e tij për marrëdhënie konstruktive bashkëpunimi dhe menaxhim efektiv të mosmarrëveshjeve“, u tha në një deklaratë nga Shtëpia e Bardhë. Njoftimi shton se të dy udhëheqësit ranë dakord të takohen në kuadër të samitit të NATO-s në muajin Qershor. Ndërkaq në një njoftim të Presidencës turke thuhet se Erdogan dhe Biden ranë dakord për të përmirësuar bashkëpunimin.