Ushtria e Shteteve të Bashkuara të Amerikës ka nisur dërgimin e rreth 9,000 trupave shtesë dhe një grupi të ri anijesh ushtarake drejt Lindjes së Mesme. Përforcimi i ri përfshin grupin e goditjes të aeroplanmbajtëses USS Theodore Roosevelt si dhe grupin amfib USS Makin Island, duke e çuar numrin e aeroplanmbajtëseve amerikane në rajon në tre (përfshirë USS George H.W. Bush dhe USS George Washington).

Kjo lëvizje strategjike pritet ta çojë praninë totale detare të SHBA-së në rajon në më shumë se 20,000 marinarë e marinsat dhe qindra avionë luftarakë deri në fund të muajit tetor.

Paralajmërimet e Trump për sulme të reja dhe refuzimi i armëpushimit

Presidenti Donald Trump njoftoi se SHBA po shqyrton mundësinë e zgjerimit të goditjeve ushtarake ndaj Iranit, veçanërisht pas dyshimeve për lidhjen e Teheranit me incidentin e fundit në bordin e një fluturimi të FlyDubai. I pyetur nga gazetarët mbi pretendimet se Irani mund të jetë i lidhur me sulmin ndaj kapitenit të avionit, Trump deklaroi se po punohet për konfirmimin e të dhënave, duke paralajmëruar reagim të rreptë.

“Oh, ata do të goditen shumë rëndë, mos u shqetësoni. Thjesht pyetini ata. Ata e dinë çfarë ka ndodhur. Ata do të goditen shumë rëndë.”, tha Trump.

Në një intervistë për revistën Time, Trump bëri me dije gjithashtu se ka hedhur poshtë propozimin e fundit të Iranit për armëpushim dhe hapjen e Ngushticës së Hormuzit, duke e cilësuar atë si “jo mjaftueshëm të mirë” dhe duke lënë të hapur mundësinë e intensifikimit të bombardimeve pas zgjedhjeve të mesmandatit në SHBA.

Kompleksiteti i konfliktit dhe dyshimet për taktika asimetrike

Zyrtarët e inteligjencës dhe ushtrisë shprehin shqetësimin se përballë bllokadës detare mbi eksportet e naftës, Teherani mund të jetë duke aplikuar taktika asimetrike. Përveç incidentit ajror, shqetësimet janë shtuar edhe pas arrestimeve në Mbretërinë e Bashkuar, ku një shtetas me dyshtetësi britaniko-iraniane u ndalua pas dyshimeve për planifikimin e një sulmi terrorist pranë bazës ajrore RAF Fairford, pikë nga ku operojnë bombarduesit amerikanë.

/rtsh.al/