Ka shkuar në 57 numri i viktimave nga tragjedia e përplasjes së dy trenave të Tempi të Greqisë. Sipas kreut të mjekësisë ligjore të Larisës, Rubini Leontari, tashmë po kryhen analizat e ADN-së për të identifikuar viktimat, teksa pritet që numri i personave të vdekur të rritet akoma.

Ende vijon operacioni i kërkim-shpëtimit në terren, ku forcat zjarrfikëse po punojnë kërkojnë në vagonat e shkatërruar të trenave.

Shumë nga pasagjerët në bord ishin studentë rreth të 20-tave që ktheheshin në Selanik pas një fundjave të gjatë duke festuar Kreshmën Ortodokse Greke, teksa familjarët kanë dhënë mostra të ADN-së për të ndihmuar përpjekjet e identifikimit, teksa procesi pritet të përfundojë sot.

Ngjarja e rëndë ndodhi pak para mesnatës së së martës, ku një tren pasagjerësh që transportonte 350 persona u përplas me një tren mallrash pasi të dy përfunduan në të njëjtën linjë, duke bërë që vagonët e përparmë të shpërthejnë në flakë.

Një përgjegjës stacioni 59-vjeçar në Larisa është akuzuar për vrasje nga pakujdesia dhe do të dalë në gjykatë të enjten. Ai ka mohuar akuzat, duke deklaruar se shkak për përplasjen u bë një defekt teknik.

Ministri i transportit i vendit ka dhënë dorëheqjen për incidentin, duke thënë se ai do të marrë përgjegjësinë për “dështimet e gjata” të autoriteteve për të rregulluar një sistem hekurudhor që nuk ishte i përshtatshëm për shekullin e 21-të. Ndërkohë, qeveria greke ka premtuar një hetim të pavarur që premton se do të japë drejtësi./ CNN.gr

/rtsh.al/