“Kcimi i Tropojës” dhe tupanët në shesh paralajmërojnë nisjen e festimeve që do të zgjasin deri në mbrëmje vonë. Është “Festa e Gështenjës”, një ditë kushtuar frytit magjik ndër më të veçantit në llojin e tij Ballkan e më gjerë. Ansambli Dardania i paraprin panairit të organizuar nga prodhuesit dhe përpunuesit e gështenjës.  Ata që merren me gështenjën, qoftë prodhues por edhe përpunues na flasin për atë dallim të madh që ka gështenja  e Tropojës me vendet e tjera ku zhvillohet e kultivohet ky frut.

“Një frut që kohët e fundit ka shumë kërkesë për të. Eksportohet kryesisht në Itali, Francë, Hungari, në disa shtete të Evropës”, u shpreh Albert Çelaj, Sipërmarrës.

“Masivi më i madh pothuaj që kemi në Ballkan dhe historikisht ka pasur vlerë ekonomike për Tropojën”, tha Trashëgim Toska Fermer.

Në panair janë ekspozuar frutat e gështenjës bashkë me nënproduktet e saj ku spikat mjalti por edhe gatimet e tjera tradicionale me bazë gështenje.

Vitet e fundit, sipërmarrësit e Tropojës sasinë më të madhe të prodhimit e eksportojnë në shtetet e Evropës e më gjerë. Tashmë kanë pikat e tyre të grumbullimit e përpunimit duke nxitur më tej zhvillimin e kësaj industrie që po ndikon edhe në ekonominë lokale.

Gazetar: Bujar Muçmata

/rtsh.al/