Presidenti i Shteteve të Bashkuara, Donald Trump, ka akuzuar Iranin se ka shkelur marrëveshjen e armëpushimit të nënshkruar javën e kaluar midis dy palëve, duke lëshuar të paktën katër dronë sulmues ndaj anijeve në Ngushticën e Hormuzit.

Në një postim në platformën Truth Social, Trump ka dhënë detaje të incidentit: “Një nga dronët goditi drejtpërdrejt kuvertën e sipërme të një anijeje të madhe dhe shumë të shtrenjtë transportuese mallrash. U shkaktua dëm, por anija arriti të vazhdojë rrugën e saj. Ne rrëzuam tre dronët e tjerë”, shkroi Trump.

Presidenti amerikan e cilësoi veprimin iranian si “një shkelje të dukshme dhe të marrëzishme të marrëveshjes sonë të armëpushimit”, por nuk specifikoi nëse Shtetet e Bashkuara do të ndërmarrin ndonjë masë kundërpërgjigjeje.

Ngushtica e Hormuzit është një nga rrugët më strategjike të transportit detar në botë, ku kalon një pjesë e madhe e naftës së botës, ndërsa çdo tension në këtë zonë rrezikon të ndikojë seriozisht në çmimet globale të energjisë dhe sigurinë e lundrimit ndërkombëtar.

Marrëveshja e armëpushimit midis SHBA-së dhe Iranit u nënshkrua vetëm javën e kaluar, pas një periudhe tensionesh të larta që kishin rrezikuar të shpërthenin në konflikt të drejtpërdrejtë.

Detajet e plota të asaj marrëveshjeje nuk janë bërë ende publike në tërësi, por ajo pritej të ulte tensionet ushtarake në rajon.

/rtsh.al/