Presidenti amerikan Donald Trump deklaroi të enjten se beson se lufta me Iranin do të përfundojë “shumë shpejt”, duke shtuar se Teherani “nuk mund të vazhdojë më gjatë”.

Duke u përgjigjur pyetjeve të gazetarëve në Zyrën Ovale, ndërsa fliste për çmimet e energjisë në nivel global dhe në SHBA, Trump tha: “Mendoj se do të përfundojë shumë shpejt. Nuk mendoj se ata mund të vazhdojnë më shumë”.

Trump ka parashikuar disa herë më parë se lufta do të përfundonte “shumë shpejt”, “brenda disa ditësh” ose “brenda dy-tre javësh”, por përleshjet dhe tensionet kanë vazhduar me ndërprerje, duke përfshirë shkëmbime zjarri, sulme në Ngushticën e Hormuzit dhe periudha të brishta të pushimit të zjarrit.

Situata aktuale në Ngushticën e HormuzitNdërkohë, Irani po zhvillon bisedime me Omanin për një marrëveshje që do të formalizonte një rrugë të re për anijet tregtare nëpër Ngushticën e Hormuzit – një nga rrugët më të rëndësishme të naftës në botë.

Sipas zëvendësministrit iranian të Jashtëm, Kazem Gharibabadi, bisedimet janë në “fazën përfundimtare” dhe dy vendet kanë arritur një marrëveshje parimore për pothuajse të gjitha pikat, duke përfshirë hartën e rrugëve të hyrjes dhe daljes.

Marrëveshja e propozuar parashikon që një pjesë e madhe e trafikut tregtar të kalojë nëpër ujërat territoriale iraniane, duke krijuar një model të ri nga praktika e 60 viteve të fundit.

Zyrtarë iranianë theksojnë se kjo nuk do të thotë rihapje e plotë e ngushticës dhe se nuk ka bisedime të drejtpërdrejta me Shtetet e Bashkuara për një marrëveshje përfundimtare që do të mbyllte përgjithmonë konfliktin.

Teherani ka deklaruar disa herë se nuk është aktualisht në bisedime të drejtpërdrejta me Uashingtonin për një marrëveshje të qëndrueshme paqeje, edhe pse ka pasur mesazhe dhe përpjekje ndërmjetësuese përmes vendeve të treta.

/rtsh.al/