Presidenti i Shteteve të Bashkuara Donald Trump ka rindezur betejën e ashpër ligjore me gazetën prestigjioze The Wall Street Journal. Kreu i Shtëpisë së Bardhë ka dorëzuar një padi të rishikuar për shpifje pasi gjykata ia rrëzoi kërkesën e parë muajin e kaluar.

Përplasja e madhe mes tyre nisi pas një raportimi për një letër me përmbajtje të turpshme drejtuar financierit Jeffrey Epstein. Sipas medias amerikane letra e ditëlindjes mbante firmën e Trump por ky i fundit e ka mohuar prerazi këtë fakt.

Gjykatësi i Floridës e rrëzoi padinë fillestare me argumentin se nuk u vërtetua keqdashja e gazetarëve gjatë publikimit. Pavarësisht këtij vendimi në dokumentet e reja presidenti këmbëngul se artikulli u bë me qëllim të pastër denigrues. Ashtu si herën e parë Trump kërkon një dëmshpërblim rekord prej të paktën dhjetë miliardë dollarësh nga manjati Rupert Murdoch.

Ky nuk është sulmi i parë i kreut të shtetit ndaj mediave që ai i cilëson vazhdimisht si armiqësore. Dokumentet e zbardhura së fundmi konfirmojnë se Trump ka pasur kontakte me Epstein në të shkuarën por pa asnjë lidhje kriminale. Tashmë pritet lëvizja e radhës nga drejtësia amerikane për të parë nëse kjo padi do të pranohet për shqyrtim.

/rtsh.al/