Nga Janari i vitit të ardhshëm do të fillojë vaksinimi i vajzave mbi 14 vjeç kundër “Human Papiloma Virus” për të zeruar shanset e prekjes nga Kanceri i qafës së mitrës. Sipas Përgjegjëses së Programit Kombëtar të Vaksinimit në Institutin e Shëndetit Publik, Rovena Daja deri në fund të viti do ta vazhdojë vaksinimi i vajzeve 13-vjeçare.

“Gjatë këtij viti u vu re një rritje e kërkesës nga vajzat më të rritura, 14, 18, 20 vjeç për t’u vaksinuar. Kemi menduar të organizojmë një fushatë vaksinimi për të gjitha vajzat mbi 14 vjeç e sipër për t’i vaksinuar nga Janari i vitti 2024 e në vazhdim në mënyrë që edhe ato të kenë mundësi të vaksinohen ndaj HPV”, tha ajo.

Daja sqaron se pavarësisht rritjes së interesit, fushata e vaksinimi që do të kryhet në shkolla e media, është e domosdoshme që vaksina të përthithet nga të gjitha vajzat.

“Vaksinimi “catch-up” bëhet në shkolla, qendra shëndetësore, në pikat e vaksinimit. Këto fushata zgjasin nga 6-12 muaj për t’i kapur të gjitha vajzat e kësaj grupmoshe që duhet të vaksinohen”, shtoi Daja.

Ende nuk ka një shifër zyrtare për mbulesën vaksinale të arritur por mbi 5 mijë vajza 13 -vjeçare janë vaksinuar ndërsa plani është mbi 15 mijë çdo vit. S

Sipas rekomandimeve të ekspertëve vaksina ofrohet në një dozë të vetme.

Gazetare: Sonila Mlloja 

/RTSH/