Policia Shqiptare vazhdon të kërkojë me intensitet zbardhjen e vdekjes së një 22 vjeçare nga Kenia pak kohë më parë në Tiranë.

Policia  ka njoftuar se ka shoqëruar shoferin e kazinosë, në të cilën punonte 22-vjeçarja nga Kenia, Joy Ayoko. Rodi Barci, 32 vjeç, do të merret në pyetje. 

Sipas njoftimeve efektivë të policisë kanë kryer edhe kontroll në banesën e tij me kërkesë të Prokurorisë dhe vendim të Gjykatës së Tiranës.
22-vjeçarja nga Kenia, Joy Ayoko, dyshohet se është hedhur nga ballkoni i banesës në të cilën jetonte e si pasojë e plagëve të rënda humbi jetën disa muaj pas qëndrimit në spital.

Grupi hetimor po punon edhe për rimarrjen në pyetje të shtetases keniane Emily Mutua, mikeshë e Joy. Prokuroria e Tiranës më herët i ka dërguar letërporosi prokurorisë së Kenias dhe i ka kërkuar që t’i vërë në dispozicion autopsinë që i është bërë 22-vjeçares në morgun e spitalit ku ndërroi jetë. Kjo kërkesë erdhi në kuadër të hetimeve të Prokurorisë së Tiranës për vdekjen 22-vjeçares, e cila u largua nga Shqipëria më 25 janar të këtij viti drejt vendlindjes për t’u mjekuar atje.

Më 14 gusht të vitit 2022 22-vjeçarja u shtrua për kurim në spitalin e Traumës.

Joy Ayoko kishte ardhur në Shqipëri për të punuar e jetuar si emigrante afro një vit më parë.

/ rtsh.al /