Një alarm të fortë për ndërhyrje të menjëhershme e ka konsideruar Avokati i Popullit ngjarje e rëndë të regjistruar në Sukth, ku 41-vjeçarja Bedrie Loka u vetëvra.

Në një postim në Facebook, Avokati i Popullit i bën thirrje shoqërisë për humanizëm dhe që të mos pranohet bullizimi i asnjë forme.

“Ngjarja e rëndë e vetëvrasjes së një gruaje në Shqipëri, si pasojë e fyerjes dhe denigrimit personal në një platformë sociale, ishte thellësisht tronditëse dhe duhet të shërbejë si një alarm i fortë për nevojën e një ndërhyrjeje të menjëhershme.  Pranimi i një realiteti ku të gjithë kemi ndjeshmëri dhe vulnerabilitet është thelbi i një komuniteti të shëndetshëm, e kundërta është bullizëm!

Refuzimi i bullizmit dhe i të gjitha formave të tij duhet të jetë në thelbin e vlerave tona dhe reagimi shoqëror ndaj kësaj tragjedie duhet të jetë më shumë se një reagim sipërfaqësor; duhet të jetë një angazhim i përhershëm për të krijuar një mjedis dashamirës”, thuhet në reagim.

Sipas Avokatit të Popullit, mirëkuptimi shoqërorë duhet të përcaktojë sjelljen në përditshmëri.

“Në një kohë kur teknologjia është pjesë e pandarë e jetës tonë, duhet të mbajmë në vëmendje thelbin e humanizmit dhe respektit reciprok. Fyerjet dhe bullizmi nuk mund të tolerohen! ‘Mirëkuptimi shoqëror’ duhet të jetë më shumë se një frazë; duhet të jetë një parim që përcakton sjelljet tona në përditshmëri.  Avokati i Popullit bën një thirrje të dedikur për të gjithë komunitetin e platformave të mediave sociale, për të ndërtuar një mjedis mbrojtës dhe të shfaqi kujdes për mirëqenien emocionale të të gjithë qytetarëve”, përfundon reagimi.

/rtsh.al/