Policia ka vendosur në pranga një 33 vjeçar pasi ka shfrytëzuar për prostitucion një 24-vjeçare. 33-vjeçari akuzohet se ka dhunuar të renë si dhe i ka hequr asaj lirinë për 2 muaj duke e detyruar të ushtrojë veprimtarinë e prostitucionit.

 “Brenda tre ditëve nga shpallja në kërkim, kapet dhe vihet në pranga organizatori i veprimtarisë kriminale të shfrytëzimit për prostitucion.  I ndaluari, së bashku me 3 shtetase të arrestuara gjatë operacionit “Imponimi”, dhunoi një 24-vjeçare dhe i hoqi asaj lirinë, për 2 muaj, duke e detyruar që të ushtronte prostitucion”, thuhet në njoftimin e policisë.

Sipas policisë, së bashku me tre gratë e tjera, 33-vjeçari me inicialet A.M ka shfrytëzuar 24-vjeçaren për prostitucion duke marrë me qira hotele të ndryshme në qytetin e Fierit.

“A. M., 33 vjeç, banues në Fier, për veprat penale “Heqja e paligjshme e lirisë”, “Shfrytëzimi i prostitucionit” dhe “Mbajtja e lokaleve për prostitucion”.

Nga hetimet e kryera nga Specialistët për Hetimin e Trafiqeve të Paligjshme të DVP Fier në bashkëpunim me Prokurorinë e Fierit, në kuadër të operacionit policor të koduar “Imponimi”, të zhvilluar tre ditë më parë, rezultoi se 33-vjeçari, në bashkëpunim me 3 shtetase tashmë të arrestuara, i kanë hequr lirinë, nëpërmjet kërcënimit dhe dhunës, një 24-vjeçareje dhe e kanë shfrytëzuar atë për prostitucion, për një periudhë dymujore, në banesa me qira dhe në hotele të ndryshme në qytetin e Fierit”, theksohet më tej në njoftimin e policisë.

/rtsh.al/