Sulmi i Rusisë mbi Ukrainën 1 vit më parë ka qenë katastrofik jo vetëm për ukrainasit, por ka tundur edhe themelet e Evropës, si dhe ka formësuar historinë botërore. Ky ka qenë thelbi i fjalës së ministres së Jashtme, Olta Xhaçka, në Këshillin e Sigurimit të OKB-së, në një vjetorin e pushtimit rus të Ukrainës.

Shefja e diplomacisë shqiptare, në fjalën e saj, është ndalur edhe në efektet sociale me karakter global të këtij konflikti, duke nënvizuar se mijëra civilë kanë humbur jetën dhe miliona të tjerë në mbarë botën, sidomos më të varfrit dhe shtresat më të prekura, kanë vuajtur për shkak të rritjes së krizës ushqimore.

“Kjo ditë nuk ka asgjë për të festuar, përkundrazi është një ditë pendese. Gjithsesi një gjë duhet të theksojmë dhe të mos harrojmë kurrë: nga një luftë katastrofike dhe pasojat e saj të tmerrshme, ne kemi parë botën jashtëzakonisht të bashkuar për të dënuar një luftë që erdhi nga zgjedhja, për të refuzuar aneksimin territorial me forcë, për të respektuar ligjin ndërkombëtar, dhe për të mbrojtur Kartën e OKB-së. Sërish dje, 141 Shtete Anëtare nga të gjitha anët e botës, konfirmuan njëzëri se ata nuk duan një botë sipas Rusisë, por një botë sipas Kartës së OKB-së; se ata duan paqe, një paqe të drejtë për Ukrainën dhe popullin e saj.”- theksoi Xhaçka.

Sipas saj, një vit më parë, trupat ruse u vërsulën drejt kufijve të Ukrainës dhe raketat ruse mbushën qiellin e saj duke ndezur luftën brutale që vazhdon deri në këtë orë dhe se ajo që Rusia filloi pikërisht në këtë ditë të vitit të kaluar ka qenë katastrofike për Ukrainën, ka tundur themelet e Evropës, ka formësuar historinë botërore.

Xhaçka nënvizoi se mijëra civilë kanë humbur jetën; miliona fëmijë kanë humbur shkollat e tyre; njerëz të panumërt kanë humbur shtëpitë e tyre; miliona të tjerë janë zhvendosur dhe dëmet në infrastrukturën dhe ekonominë e Ukrainës janë të pamatshme dhe se miliona në mbarë botën, sidomos më të varfrit dhe shtresat më të prekura, kanë vuajtur shumë për shkak të efekteve globale të luftës, veçanërisht të rritjes së krizës ushqimore.

“Gjatë gjithë vitit, bota ka qenë dëshmitare e ngjarjeve, ka verifikuar dhe dokumentuar krime të neveritshme, ekzekutime, përdhunime, plaçkitje, tortura, dëbime të fëmijëve, krime lufte dhe krime kundër njerëzimit të kryera nga pushtuesi. Ne kemi qenë dëshmitarë të mijëra të dënuarve që u detyruan të mobilizohen dhe u sakrifikuan në radhët e grupit Ëagner, një makinë vrasëse me gjurmë famëkeqe dhe në pjesë të tjera të botës. Dhe më e tmerrshmja nga të gjitha është se një luftë e padrejtë, e paligjshme dhe e paprovokuar kundër një vendi dhe populli të pafajshëm, kryhet nga një anëtar i përhershëm i këtij Këshilli, i cili ka përgjegjësi të veçantë për garantimin e paqes dhe sigurisë, për zbatimin e Kartës së OKB-së dhe të drejtës ndërkombëtare. Në vend të kësaj, ajo ka zgjedhur të sillet si shtet që nuk njeh rendin ndërkombëtar, duke shkuar kundër ligjit, kundër rregullave, kundër botës.”- theksoi Xhaçka.

Sipas saj, e vërteta është se pavarësisht gjithçkaje, Ukraina dhe populli i saj ndonëse është duke vuajtur, po lufton, duke rezistuar në mbrojtjen e tokës, lirisë, dhe të ardhmes së tyre dhe se ata nuk janë vetëm, pasi lufta e tyre është edhe lufta e kujtdo që aspiron paqen.

“Rusia sigurisht që ka shumë arsye për të qenë krenare për historinë e saj. Por, mbi të gjitha, shtetet dhe liderët e tyre gjykohen nga aftësia për të mësuar nga e kaluara dhe për veprimet e tyre në të tashmen. Aktualisht, Rusia nuk ka asnjë arsye për të qenë krenare. Me veprimet e saj të gabuara, me politikën e saj katastrofike dhe me luftën e saj kriminale, Rusia është izoluar dhe faji bie vetëm mbi të për këtë izolim. Sa më shpejt ta kuptojnë rusët e zakonshëm, aq më shpejt do të ndalet kjo marrëzi.“- theksoi Xhaçka.

Numri 1 i politikë shqiptare apelon që kjo luftë duhet të marrë fund dhe do të marrë fund, por fundi që parashikohet është fundi i agresionit, jo fundi i rendit botëror të bazuar në rregulla.

“Është fundi i pranisë së trupave ruse në Ukrainë, jo fundi i jetës atje. Ukraina duhet të ketë dhe do të ketë një të ardhme me një paqe të drejtë dhe të qëndrueshme, të lirë, të sigurt, sovrane dhe brenda integritetit të saj territorial të rivendosur, dhe ne presim me padurim ditën, që shpresoj të jetë së shpejti, të fillimit të një procesi shërimi dhe pajtimi. Por derisa të vijë ajo ditë, Ukraina dhe populli i saj meritojnë të gjithë mbështetjen tonë politike, ekonomike dhe ushtarake, të gjithë solidaritetin tonë në rezistencën e tyre heroike për të mbrojtur veten, për të mbrojtur të drejtën.”- deklaroi Xhaçka.

/rtsh.al/