Komisioni Qendror i Zgjedhjeve ka tërhequr vëmendjen e përfaqësuesve politik dhe kandidatëve që të respektojnë heshtjen zgjedhore dhe solemnitetin e ditës së votimit.

Në një reagim KQZ shprehet se “sot është dita e qytetarëve që kanë të drejtën e zgjedhjes dhe se deklaratat politike cënojnë standardet e procesit zgjedhor dhe janë në shkelje të dispozitave të Kodit Zgjedhor“.

Gjithashtu, KQZ tërheq vëmendjen e Komisioneve të Qendrave të Votimit që të respektojnë Kodin Zgjedhor dhe të mos lejojnë persona të paautorizuar në Qendrat e Votimit.

Pasi siç thuhet në reagimin e KQZ “në QV dhe rreth tyre lejohen vetëm zgjedhësit, vëzhguesit e akredituar dhe stafi teknik i KQZ”.

Rreth 33 mijë qytetarë të bashkisë Rrogozhinë i janë drejtuar këtë të diel qendrave të votimit për të zgjedhur kryebashkiakun e tyre. Përballë janë dy kandidatët, ai i Partisë Socialiste, Edison Memolla dhe i Koalicionit “Bashkë Fitojmë”, Shkëlqim Hoxha.

Shkak për ripërsëritjen e procesit u bë kutia e votimit në institucionin e vuajtjes së dënimit në Rrogozhinë, ku rezultoi se numri i votave ishte më i madh se ai i diferencës mes dy kandidatëve. Ndryshe nga 14 maji, të burgosurit nuk do lejohen të votojnë për shkak të afateve kohore.

Sipas KQZ deri në orën 11:00 pjesëmarrja  në votime është rritur 24.11%. 

/rtsh.al/