Ndërsa na ndajnë vetëm dy ditë nga zgjedhjet e përgjithshme parlamentare, Kryebashkiaku Erion Veliaj, nga qelia, u ka bërë thirrje qytetarëve, që më 11 maj të votojnë Partinë Socialiste.

Veliaj u kërkoi qytetarëve që kur të marrin në dorë fletën e votimit me listën e partive e kandidatëve, të kujtojnë transformimin që ka pësuar Tiranë përgjatë viteve, për të kuptuar se cilën parti të votojnë.

“Do të doja shumë të isha në këtë fushatë jo si spektator, por si pjesë e saj. Sepse besoj fort, me gjithë shpirt, tek kjo rrugë që kemi ndërtuar së bashku. Por, edhe në distancë, nuk mund të mos ju bëj një thirrje nga zemra:

Të dielën, kur të shkoni për të votuar, kur të merrni në dorë fletën e votimit e shihni aty listën e partive e kandidatëve, ndaluni një çast e kujtoni pak si ishte Tirana dhe si është sot. Kujtoni si ishte Shqipëria dhe çfarë është bërë. Kujtoni kush janë ata që e sollën këtë ndryshim dhe kush janë ata që duan ta kthejnë pas.

Një votë për Saliun & Co do të thotë t’i vësh shkelmin çdo gjëje që kemi ndërtuar, të ardhmes europiane të fëmijëve tanë.

Por nuk duhet të jetë frika nga ajo turmë zullumqare arsyeja për të bërë zgjedhjen e drejtë në 11 maj. Vota juaj në 11 maj nuk duhet të jetë një votë kundër Saliut apo partizave të dala nga barku i PD. Vota juaj duhet të jetë një votë për punën, për shpresën, për transformimin. Vota juaj duhet të jetë një votë për të tashmen që na bën krenar dhe të ardhmen europiane që meritojmë”, shkruan Veliaj në rrjetin social Facebook.

/rtsh.al/