Policia e Shtetit ka bërë të ditur se në internet ka nisur një fushatë mashtrimi duke iu zhvatur paratë qytetarëve duke përdorur emrat e titullarëve të këtij institucioni.

Drejtoria për Hetimin e Krimeve Kibernetike thekson se ka nisur puna policore për parandalimin e pasojave, për hetimin e ngjarjes, si dhe për identifikimin dhe kapjen e autorëve.

“Drejtoria për Hetimin e Krimeve Kibernetike është vënë në dijeni për një fushatë mashtrimi nëpërmjet sistemeve kompjuterike, e cila synon persona fizikë dhe juridikë, pa dallime të caktuara, me qëllim marrjen e shumave të ndryshme monetare”, thuhet në njoftimin e Policisë së Shtetit.

Gjithashtu, shpjegohet edhe mënyra që ndjekin mashtruesit për të zhvatur qytetarët, të cilëve iu dërgohet një mesazh në postën elektronike, shoqëruar me dokumentin e rremë që i bashkëngjitet këtij mesazhi.

Për të rritur besueshmërinë e veprimtarisë së tyre, mashtruesit përdorin emrat e titullarëve të Policisë së Shtetit.

Për këtë arsye, ky institucion fton qytetarët “të denoncojnë menjëherë në adresën e postës elektronike ç@asp.gov.al, të Drejtorisë për Hetimin e Krimeve Kibernetike, e cila është duke kryer hetime intensive dhe në ditët në vijim do të japë më shumë informacion rreth kësaj fushate mashtrimi.”

/rtsh.al/