Ministria e Mbrojtjes ka publikuar të dhënat më të fundit në lidhje me situatën e zjarreve në vend. Sipas ministrisë së Mbrojtjes, tashmë është fikur zjarri në drejtim të Kreshpanit dhe po mbahet në monitorim nga trupat e FA dhe efektivë të MZSH.

Ministria informon se si rezultat i punës së pandërprerë të forcave të emergjencave civile, ndihmuar edhe nga efektivë të Forcave të Armatosura, si dhe nën koordinimin e Agjencisë së Mbrojtjes Civile, është arritur të përmirësohet situata në disa vatra zjarri në territorin e vendit.

“Është fikur zjarri në drejtim të Kreshpanit, në masivin me ullishte dhe po mbahet në monitorim nga trupat e FA dhe efektivë të MZSH.Ndërkohë po vazhdon operacioni për vënien nën kontroll të flakëve në masivin pyjor Plyk- Kraps-Gjorkos.”- thuhet në njoftim.

 Sipas ministrisë së Mbrojtjes, në fshatin Hekal, në Mallakastër, situata është nën kontroll dhe po izolohet edhe vatra e fundit aktive.

 “Po vijon operacioni për kapsulimin e vatrave në vendgrumbullimin e mbetjeve urbane, në Vlorë. E vështirë është puna e forcave të emergjencave për shkak të terrenit në fshatin Buz, në bashkinë Memaliaj. Por përhapja e zjarrit është e dobët, pasi zjarri ndodhet mes dy zallishteve.”- informon ministria.

 Ministria e Mbrojtjes, në vijim të infomacionit, bën të ditur se është arritur të izolohet plotësisht zjarri në malin e Gjallicës në njësinë administrative Shtiqen, në Kukës dhe po ashtu janë vënë tërësisht nën kontroll flakët dhe vatrat në fshatin Mandaj, në njësinë administrative Helmas në Kavajë.

/rtsh.al/