Komisioneri Shtetëror për Zgjedhjet, Ilirjan Celibashi, ka publikuar zyrtarisht numrin e zgjedhësve, të cilët morën pjesë në zgjedhjet vendore të 14 majit 2023. Sipas Celibashit, në këto zgjedhje morën pjesë 38% e votuesve që ishin në lista.

“Kjo është shifra zyrtare e pjesëmarrjes në zgjedhje. Kjo shifër ka të bëjë me numrin e votuesve për kryetarë të bashkive, por që pak a shumë korenspondon edhe për këshillat bashkiakë”- deklaroi Celibashi.

Lista zyrtare e votuesve përbëhej nga 3,650,550 shtetas shqiptarë me të drejtë vote. Nga këto, 122,545 zgjedhës votonin për herë të parë. Në zgjedhjet e 14 majit votuan 1.395.360 zgjedhës.

Celibashi ka bërë publik zyrtarisht edhe emrat e kryebashkiakëve, të cilët fituan në këto zgjedhje ku 53 mandate u morën nga PS; 7 mandate nga koalicioni “Bashkë Fitojmë” dhe 1 mandat nga partia MEGA.  

Kryekomisioneri Celibashi, sqaroi edhe pozicionin e tij, lidhur me mosfunksionimin e pajisjeve identifikuese elektronike në ditën e zgjedhjeve. Sipas tij, vetëm 5% e qendrave të votimit janë hapur pas orës 08:00 dhe kjo vonesë, sipas tij, nuk ka pasur impakt të madh në proces.

“90% e qendrave të votimit janë hapur mesa orës 07:00 dhe 7:30. Vetëm 5% pas orës 8. Për 5% të tjera procesi i hapjes ka filluar mes orës 08:00 dhe 09:30. Pra janë vetëm 5% e qendrave ku procesi ka filluar pas orës 8. Këto janë faktet. Mbi këto fakte, mund të bëhen vlerësimet, por jo se këto vonesa kanë ndikuar negativisht në mbarëvajtjen e procesit”,- tha Celibashi.

Kryeminisioneri nuk pranoi të komentonte deklaratën e kryeministrit Rama se „ky ishte një dështim skandaloz i KQZ”.

“Nuk kam koment për këtë deklaratë të kryeministrit”, tha Celibashi.

/rtsh.al/