Me nisjen e vitit të ri arsimor, kanë hapur dyert edhe institucionet parashkollore në Bashkinë Kukës. Këtë vit, në kopshtet dhe çerdhet në të gjithë territorin e bashkisë janë regjistruar rreth 1400 fëmijë, të cilët do të ndjekin programet edukative dhe aktivitetet e parashikuara përgjatë vitit.

Drejtoresha e arsimit parashkollor bën me dije se institucionet janë tashmë në funksion të fëmijëve.

“Kemi një numër të konsiderueshëm deri në 1400 fëmijë në të gjithë bashkinë e Kukësit duke përfshirë dhe njësitë administrative. Puna ka filluar, kopshti është hapur, çerdhet janë hapur, fluksi është i përditshëm. Në krahasim me vitin e kaluar pothuajse numri është i njëjtë përveç se numrit të madh që është shtuar në çerdhe kohët e fundit dhe grupi i ri që është hapur këtu në çerdhen numër tre numri është pothuajse i njëjtë”, u shpreh Albana Elezaj, Drejtoreshë e arsimit parashkollor.

Përtej procesit të përditshëm edukativ, gjatë këtij viti priten të zhvillohen edhe aktivitete të ndryshme kulturore, artistike dhe edukative, të cilat synojnë të nxisin kreativitetin dhe socializimin e fëmijëve.

“Pjesa e aktiviteteve është një gjë shumë e rëndësishme dhe një gjë që zbatohet sipas planeve, programeve. Çdo lloj dite përkujtimore, dite festive për fëmijët, ata e festojnë në kopshte”, tha ai.

Institucionet parashkollore do të vijojnë punën gjatë gjithë vitit për të ofruar një mjedis sa më të përshtatshëm për edukimin dhe zhvillimin e fëmijëve.

Gazetare: Irda Bajraktari

/rtsh.al/