Kanë kaluar pesë vite nga shembja e urës Morandi në Genova të Italisë, që shkaktoi 43 viktima dhe shkatërroi një lagje të tërë.

Mes viktimave ishin edhe dy të rinj emigrantë shqiptarë, kur një pjesë e strukturës së urës 250 metra të gjatë u shemb papritmas gjatë një stuhie, duke bërë që automjetet që po e kalonin, të rrëzoheshin në lumin e tharë poshtë saj.

Në këtë përvjetor, homazhet u bënë nga Bashkia e Genova-s së bashku me Komitetin e Familjarëve të Viktimave të Urës Morandi.

Në orën nëntë, kryepeshkopi i Genova-s, Marco Tasca, mbajti një meshë në kishën famullitare të San Bartolomeo della Certosa.

Për këtë tragjedi po gjykohen 59 persona.

Mes tyre janë drejtuesit e Autostrade per l’Italia (Aspi), duke filluar nga ish-drejtori i përgjithshëm Giovanni Castellucci, si dhe Spea, kompania përgjegjëse për mirëmbajtjen e autostradës.

Në mesin e të akuzuarve janë edhe teknikë e drejtues të Ministrisë së Transporteve, të cilët duhet të kishin mbikëqyrur kompaninë koncesionare Aspi.

Ata janë nën akuzë për vrasje të shumëfishtë, “cenimin” e sigurisë së transportit, mosveprime zyrtare si edhe falsifikime.

Gazetar: A. Mata