Presidenti i vendit, Bajram Begaj, ka zgjedhur qytetin e Korçës për të festuar Pashkën Ortodokse. Begaj vizitoi Mitropolinë e Shenjtë të Korçës, ndërsa uroi që kjo Pashkë të sjellë mbarësi për të gjithë besimtarët ortodoksë.

“Uroj të gjithë besimtarët ortodoksë Gëzuar Pashkën! Zgjodha të jem në qytetin e Korçës në këtë ditë të shenjtë, sepse ku më shumë se tjetër se qyteti i Korçës kjo festë e shenjtë festohet me këtë gjallëri dhe atmosferë të jashtëzakonshme! Kjo gjë mu konfirmua edhe nga mitropoliti i Korçës! Në orën 00:00 të gjithë besimtarët ortodoksë ndanë me njëri tjetrin flakën, që simbolizoi Ringjalljen e Krishtit, rikthimin e shpresës dhe të dritës!  Uroj për të gjithë shqiptarët, kjo Pashkë ardhtë e mbarë, e bardhë dhe drita e Pashkës ndriçoftë mendjen, zemrat dhe jetën e shqiptarëve!“, uroi Begaj. 

Besimtarët ortodoksë në mbarë vendin kremtuan në mesnatë ngjalljen e Krishtit.  Festa e Pashkëve Ortodokse shoqërohet me vezën e kuqe, bukën e ëmbël, flakën e shenjtë dhe mishin e qengjit. Vezët janë simbol i lindjes se jetës nga guaçka e vdekjes. Ngjyra e kuqe simbolizon gjakun e Krishtit dhe përplasja e tyre simbolizon çarjen e pushtetit te Ferrit me ngjalljen e Krishtit.

Fjala Pashkë shoqërohet me fjalën e ndritshme, duke treguar ose simbolizuar dritën, që del nga varri i Krishtit.

/rtsh.al/