Në prag të zgjedhjeve vendore te 14 Majit, aktorë të përfshirë në proces diskutuan rreth sfidave të procesit zgjedhor. Komisioneri i KQZ, Ilirjan Celibashi tërhoqi vëmendjen e partive politike sa i përket përzgjedhjes së kandidatëve, teksa tha se duhen ashtu siç e parashikon ligji duhen zgjedhur individe pa rekorde kriminale.

“Eshtë thelbësore që kandidatët që do u paraqiten të jenë individë të përshtatshëm e me integritet që të mund të mbështesin parimet e demokracisë dhe  t’u shërbejnë interesave të zgjedhësve. Një kandidat i përshtatshëm zotëron kualifikimet dhe atributet e nevojshme për të mbajtur poste publike. Janë individë që kanë një histori të dëshmuar të sjelljes së tyre etike, integritetit dhe respektit për shtetin e së drejtës”

Në tryezën e rrumbullakët me temën “Mbrojtja e Integritetit zgjedhor në Shqipëri” ishin të pranishëm edhe disa ambasadorë, të cilët u bënë thirrje partive politike të bashkëpunojnë për të siguruar një proces demokratik.

Ambasadori Guido De Sanctis: Ka pasur disa arritje në Shqipëri në të kaluarën por mbetet ende pune. Kjo bëhet nëse institucionet dhe partitë të kenë një dialog. Por kjo s’është kaq e thjeshtë. Ne ftojmë këto për një dialog të brendshëm.

Alastair King-Smith: Procesi duhet të jetë i lirë, transparent dhe i ndershëm sepse ka të bëjë me të ardhmen e Shqipërisë. Institucionet duhet të garantojnë të drejtat e qytetarëve.

Ndërsa përfaqësues të partive politike sërish shigjetuan njëri-tjetrin për problematikat e hasura në zgjedhje.

Edhe aktorë të shoqërisë civile, që monitorojnë zgjedhjet, u ndalën tek nevoja për një proces transparent.

Ky takim u organizua nga Komiteti Shqiptar I Helsinkit, me mbështetjen e Ambasadës së Mbretërisë së Bashkuar në Tiranë.

Gazetare: Albana Agolli

/rtsh.al/