Monika Kryemadhi, deputete e PL-së, shprehet e bindur në fitoren e opozitës në zgjedhjet vendore të 14 majit. Sipas saj, Belind Këlliçi, kandidat i PD-së për Bashkinë e Tiranës, ngjall mjaft interes dhe ka të sigurtë fitoren në këto zgjedhje, sepse qytetarët e duan dhe se ai çdo ditë evidenton problemet që ka kryeqyteti dhe jep alternativat për zgjidhjen e tyre.

Kryemadhi, në emisionin “Publikisht” në RTSH, shprehu bindjen se opozita, pavarësisht problemeve me të cilat përballet PD-ja, do të jetë e bashkuar të paktën në tre bashkitë kryesore të vendit si Tirana, Durrësi dhe Elbasani.

“Shanset e opozitës, në zgjedhjet e 14 majit, për fitore, janë mjaft të mëdha. Ka rëndësi unifikimi i opozitës në këto zgjedhje. Pavarësisht vendimit të 3 marsit, të paktën për Tiranën, Durrësin dhe Elbasanin, opozita do të bashkohet.”- u shpreh Kryemadhi.

Sipas saj, PL do hyjë me listat e saj për Këshillat Bashkiakë dhe se PD do të hyjë me listat e veta. Kryemadhi nënvizon se PD, PL kanë edhe plan “A”, “B” dhe “C”. 

“PL do të ketë këshilltarët e saj. Janë edhe 4 kandidatë tanët të PL-së, që janë zgjedhur nga primaret. Ne kemi ndjesi positive për rezultatin e zgjedhjeve. E shikoj pozitive pakënaqësinë e qytetarëve. Kjo do të shtojë energjinë e opozitës. Fitorja është e sigurtë nëse ecim me vendosmëri. Problem më i madh është që të nxisim njerëzit të shkojnë në votime.”- theksoi Kryemadhi.

/rtsh.al/