Vijon diskutimi maratonë i Kryeministrit Rama me ministrat e qeverisë për të bërë analizën e 12 muajve të shkuar dhe projektet përgjatë këtij viti. Kryeministri Rama deklaron se analiza e detajuar e 2022-shit e bën edhe më optimistë qeverinë për 2023-shin, dhe jep mundësinë e një reflektimit të dobishëm mbi çdo sektor.

“Vazhdojmë edhe sot diskutimin maratonë të fillimvitit, ku analiza e detajuar e 12 muajve të shkuar na bën shumë optimistë për 2023-shin, po na jep edhe mundësinë e një reflektimi shumë të dobishëm mbi çdo sektor”, shkruan Rama në rrjetin social Facebook. Rama është takuar edhe ditën e djeshme (4 janar) me ministrat në “Vilën 31”. 

Kreu i qeverisë e konsideron 2022-shin, një rekord absolut të eksporteve bujqësore. Në këtë kuadër, Rama deklaron se ambicia e qeverisë është të kapë 1 miliardë dollarë dhe ta bëjë Shqipërinë 2023, kampione të Ballkanit në eksporte bujqësore.

“2022 jo vetëm rekord absolut i eksporteve bujqësore, po edhe realizim i objektivit ambicioz për gjysëm miliardë USD. Por ambicia jonë është të kapim 1 miliardë USD dhe ta bëjmë #Shqipërinë2030🇦🇱 kampione të Ballkanit edhe në eksporte bujqësore… dhe pastaj disa që fshatin e shohin vetëm me dylbitë e mediave thonë ka vdekur bujqësia”, shkruan Rama.

/rtsh.al/