Deputetët e Partisë Socialiste, Taulant Balla dhe Arbën Pëllumbi kanë shkuar në Hagë për të takuar dhe uruar ish komandantët e UÇK-së për 110 vjetorin e Pavarësisë së kombit shqiptar.

Balla e kishte paralajmëruar një vizitë të tillë më herët gjatë punimeve të përbashkëta të dy kuvendeve të Shqipërisë dhe Kosovës që u mbajt në Tiranë.

“Për festat e Pavarësisë dhe Çlirimit të Shqipërisë tek ÇLIRIMTARËT E KOSOVËS” shkruan Balla, ndërsa ka postuar një video të tij dhe deputetit Pëllumbi në Hagë.

Deputetët kanë shkuar për të takuar ish-presidentin e Kosovës, Hashim Thaçi dhe ish-drejtuesit e tjerë të UÇK-së, Kadri Veseli, Rexhep Selimi dhe Jakup Krasniqi për t’i uruar për 110 vjetorin e Pavarësisë.

Ish komandantët e UÇK ndodhen në paraburgim në Hagë për akuzat për krime lufte. Këto akuza janë cilësuar të pabaza nga qeveria e Kosovës dhe e Shqipërisë, ku kjo e fundit ka çuar edhe një rezolutë në Këshillin e Europës për të zhbërë efektet e raportit të Dick Marty-t që e cilëson si ‘fake news” më të madh në histori.

/rtsh.al/