Një ditë pasi Presidenti Bajram Begaj dekretoi 14 majin si datën e mbajtjes së zgjedhjeve vendore të 2023, ka reaguar dhe Kryetari i Partisë së Lirisë Ilir Meta. Ky i fundit me anë të një postimi në rrjetin social Facebook shkruan se 14 maji do të jetë dita e dërrmimit të regjimit monist në Shqipëri.

Meta premton se Partia e Lirisë do të garantojë jo vetëm rikthimin e pluralizmit në këshillat bashkiakë, por do të jetë gjithashtu fuqia kryesore e zërit të qytetarëve.

“14 Maji do të jetë dita e dërrmimit të regjimit monist në Shqipëri. 4 vitet e pushtetit vendor monist dhe të paligjshëm si as në vendin më prapambetur të Afrikës do të marrin fund përgjithmonë. Partia e Lirisë do garantojë jo vetëm rikthimin e pluralizmit në këshillat bashkiakë, por do të jetë fuqia kryesore e zërit të qytetarëve që do zbatojë Llogaridhënien pa asnjë kompromis me interesin publik dhe qytetar. Të shtunën në Konventën Kombëtare zgjedhim ekipin drejtues që do të udhëheq Partinë e Lirisë drejt Fitores të padiskutueshme. Do të jetë së pari triumfi i lirisë të qytetarëve të nëpërkëmbur, të vjedhur, të intimiduar dhe të padëgjuar në këto 4 vitet e pushtetit absolut monist të Rilindjes”, shkruan Meta.

/rtsh.al/