Presidenti i Republikës Bajram Begaj, nderoi sot USAID-in me titullin “Kalorës i Urdhrit të Flamurit”, me motivacionin “Për kontributin e vyer përmes programeve në shërbim të shtetit, kombit dhe qytetarëve konsolidimin e institucioneve demokratike, nxitjen e zhvillimit ekonomik si dhe mirëqeverisjen”.

Dhënia e titullit u bë gjatë ceremonisë së kremtimit të 30-vjetorit të partneritetit mes USAID-it dhe Shqipërisë, një bashkëpunim që, sipas kreut të shtetit, ka prekur shumë fusha, duke zhvilluar kapacitetet, duke sjellë praktikat më të mira ndërkombëtare, si dhe duke mbështetur demokratizimin e vendit.

Presidenti Begaj theksoi në fjalën e tij se “projektet në ndihmë të qeverisjes vendore për përmirësimin e shërbimeve apo për administrimin e gjykatave rritën efektivitetin dhe lehtësuan jetën e qytetarëve. Mbështetja e USAID mundësoi angazhim më të madh të aktorëve shoqërorë dhe fuqizim të tyre si avokatë të interesit publik”.

“Kontributi i USAID-it në sektorë si biznesi i vogël dhe agro-biznesi kanë nxitur zhvillimin ekonomik dhe kapacitetet njerëzore të vendit duke forcuar konkurueshmërinë e sipërmarjeve shqiptare”, u shpreh Presidenti.

/rtsh.al/