Kryeministri Edi Rama ka publikuar në Facebook një pjesë nga fjala e mbajtur nga ai një ditë më parë në Asamblenë e Përgjithshme të Kombeve të Bashkuara.

Rama ka risjellë në vëmendje luftën çlirimtare të Kosovës dhe rishikimin e Rezolutës së Këshillit të Europës në mbështetje të raportit famëkeq të tregimtarit Dick Marty.

Kryeministri thekson se, Shqipëria nuk do të ndalet së luftuari për pastërtinë e luftës çlirimtare të Kosovës.

“Nuk mundem të mos ndaj me ju, një shembull të tmerrshëm që duhet të jetë mësim për gjithë botën e pikë së pari për botën demokratike. Në vitin 2011 Asambleja Parlamentare e Këshillit të Europës miratoi një raport të përpiluar nga një parlamentar i zellshëm me emrin Dick Marty, e ku akuzohej UÇK për krimin e neveritshëm të trafikimit të organeve. Z. Marty duhet të ishte paguar si tregimtar, por kurrë të besohej si raportues i Këshillit të Europës. Raporti i tij ishte tronditës, e jo vetëm shumë asokohe, i besuan, por u shndërrua në faktorin kyç të ushqimit të idesë dhe ngritjes së dhomave të specializuara të gjykatës për Kosovën. U bë një prej rasteve më të këqija të realitetit të shtrembëruar, lloji i manifestit për propagandë mbarëbotërore kundër pavarësisë së Kosovës” u shpreh Rama.

Në fjalën e tij Kreu i qeverisë shqiptare i ka bërë thirrje edhe njëherë vendeve të Ballkanit Perëndimor që t’i bashkohen nismës rajonale “Open Ballkan”, duke ftuar edhe Greqinë e Turqinë.

Rama u ndal edhe te sulmet kibernetike të Iranit, me të cilat u përball shqipëria, ku i kërkoi Asamblesë së OKB që të kthejë vëmendjen edhe te siguria kibernetike.

/rtsh.al/