Pasi Shkupi zgjidhi një mosmarrëveshje të gjatë me Bullgarinë anëtare të BE-së, Shqipëria pritet të nisë menjëherë negociatat e pranimit. Komisioneri për Zgjerim Olivér Várhelyi tha se tashmë procesi varet me ecurinë e reformave, kush ka ritme më të shpejta i bashkohet i pari BE-së.

“Shqipëria ka treguar solidaritet të vërtetë me Maqedoninë e Veriut dhe pjekuri për të kuptuar se vendet tona anëtare donin që të dy vendet të ecin përpara dhe Shqipëria tani mund të vazhdojë vetë. I gjithë procesi i zgjerimit është i bazuar në merita dhe tani gara është duke u zhvilluar, kushdo që jep i pari, duhet të ketë të drejtë të bashkohet i pari,” tha Várhelyi për Euractiv.

Sa i përket Maqedonisë së Veriut, ajo së pari do të duhet të ndryshojë kushtetutën e saj për të përfshirë bullgarët në mesin e kombeve të tjera shtet-ndërtuese, për të cilat nuk ka konsensusin e nevojshëm në parlament.

“Për Maqedoninë e Veriut, ky duhet të jetë një moment për t’u kthjelluar, edhe për opozitën. Djegia e dokumenteve në dhomën plenare, shtytja e njerëzve drejt dhunës dhe nxitja e urrejtjes nuk sjellin asgjë, vetëm dëm”, tha Várhelyi.

Lufta e Rusisë ndaj Ukrainës ka treguar nevojën për të përshpejtuar procedurat për zgjerimin e BE.   Várhelyi tha se vitet e fundit ka pasur pak ‘oreks’ për zgjerim brenda BE-së, por lufta e Rusisë ka rikthyer vullnetin për zgjerim.

“Ndoshta është ndikimi i vetëm pozitiv i luftës së Rusisë në Ukrainë, sepse e kthjelloi diskutimin rreth zgjerimit si dhe kapacitetin absorbues të BE-së. Ne evropianët, tani jo vetëm e kuptojmë, por jemi gati ta realizojmë këtë, se Evropa nuk do të gëzojë siguri, stabilitet dhe prosperitet pa u integruar plotësisht Ballkani Perëndimor,” tha Várhelyi.

Në qershor, BE i dha statusin e kandidatit Ukrainës dhe Moldavisë si një sinjal solidariteti në përgjigje të agresionit rus dhe shtetet anëtare në korrik ndezën dritën jeshile për fillimin e bisedimeve me Maqedoninë e Veriut dhe Shqipërinë.

/rtsh.al/