Kreu i Grupit Parlamentar i PD, Enkelejd Alibeaj ka reaguar për arrestimin nga policia italiane për trafikim të lëndëve narkotike të ish-kryebashkiakut të Vorës, Agim Kajmaku.

Me anë të një postimi në rrjetet sociale, Alibeaj shkruan se kur PD denoncoi aktivitetin kriminal të Kajmakut në Greqi kryeministri Edi Rama, e mbrojti dhe e justifikoi. 

Ai shprehet se sipas tij të gjitha denoncimet e PD për të inkriminuarit e Ramës janë vërtetuar dhe se arrestimi i Kajmakut është prova më e qartë.

“E mbani mend kur Edi Rama thoshte “Gimi është si puna ime”? E kishte fjalën për Agim Kajmakun, ish-kryetar i bashkisë Vorë, sot i arrestuar në Itali për trafik droge.

Kur PD e denoncoi me fakte aktivitetin kriminal të Kajmakut në Greqi, Rama e mbrojti, e justifikoi dhe e ia fshehu drejtësisë sa mundi. Nuk hoqi dorë asnjëherë prej sojit si ai, madje atë e përfshiu së fundmi edhe në zgjedhjet e 6 marsit në Vorë!

Kurioz jam të dëgjoj se çfarë do thotë sot shefi i Rilindjes, për një trafikant droge që e bëri kryetar bashkie, siç bëri shumë të tjerë, deputetë e drejtues të lartë të pushtetit të tij. Nuk pres as të skuqet e as të zverdhet, sepse është i nxirë faqje të gjithëve nga raportet e DASH dhe ODHIR! Me shumë gjasë sot, Edi Rama i zënë prapë mat, do zgjedhë kodin mafioz të heshtjes!

Denoncimet e PD në të gjitha rastet për të inkriminuarit e tij janë vërtetuar dhe është provuar se pushteti i tij, është pushtet i marrë me kriminelë e trafikantë droge dhe me votat e non gratave të tij. Agim Kajmaku është prova më e qartë për këtë. Edi Rama erdhi në pushtet me ndihmën e krimit që blenë e mblodhën vota për Rilindjen, dhe vazhdon të qëndrojë në pushtet me votat e krimit e të non gratave“, shkruan në postim Alibeaj.

Ish kryebashkiaku i Vorës, Agim Kajmaku është arrestuar nga policia italiane pasi u kap me lëndë narkotike.

/rtsh.al/