Pas mbledhjes së Këshillit europian të dhjetorit dhe në prag të presidencës franceze të Këshillit europian, Ministrja austriake për çështjet europiane Karoline Edtstadler (ÖVP) ka bërë apel për proceset e Shqipërisë e të Maqedonisë së Veriut. Wiener Zeitung citon sipas një interviste, ministren Edstadler që i është referuar përparësive franceze të kryesimit të radhës posaçërisht sundimit të ligjit për Be-në dhe zgjerimit. Duke e parë Francën si të përgatitur për këtë kryesim, pavarësisht zgjedhjeve presidenciale në prill, ministrja austriake i kanalizon angazhimin e Austrisë nën kujdesin e kancelarit federal Karl Nehammer.  

” Fokusi i Austrisë do të jetë në politikën e migracionit dhe zgjerimin e BE-së drejt Ballkanit Perëndimor. Negociatat me Maqedoninë e Veriut dhe Shqipërinë janë duke filluar aktualisht. Vendimi unanim i marrë nga shtetet e BE-së në mesin e dhjetorit, nuk duhet nënvlerësuar nga pikëpamja e “simbolizmit”. Shtetet e Ballkanit Perëndimor kanë nevojë për “një sinjal politik: Shikoni këtu, ne në fakt jemi brenda në planifikimin e ardhshëm të Bashkimit Evropian”tha Edtstadler.

Deklaratat e ministres austriake kanë nxjerrë në pah rëndësinë që i ka kushtuar BE të paturit të një vendimi unanim për të dy vendet, që shpjegon se përse BE nuk e ndan procesin e Shqipërisë nga Maqedonia  veriut, kur kjo e fundit pengohet nga Bullgaria. Përsa i përket kësaj, mediat citojnë ish presidentin bullgar borisov i cili është shprehur ditët e fundit se Bullgaria nuk i ka penguar Tiranën dhe Shkupin, po thjeshtë i ka vonuar deri sa Maqedonia e Veriut të përmbushë kushtet e Bullgarisë.