Ambasada amerikane në Tiranë ka hedhur më shumë dritë sot rreth çështjes së shpalljes së personave të padëshirueshëm nga DASH. Në një status në facebook, ambasada shkruan se administrata amerikane ka emërtuar si të tillë mbi 200 persona, nuk ka tërhequr asnjë vendim dhe nuk ka kërkuar ndjesë.
Statusi i ambasadës amerikane vjen pasi një ditë më parë ish kreu i PD dhe ish kryeministri Sali Berisha, tashmë i shpallur “person i padëshiruar” replikoi me Departamentin Amerikan të Shtetit, pasi ky i fundit hodhi poshtë akuzat e bëra nga ish-kryeministri ndaj ambasadores amerikene, Yuri Kim. Berisha tha se kritikat që ka përdorur ndaj ambasadores, Yuri Kim nuk janë sulme, por kritika. Interpretimi i tyre si sulme nuk është i drejte pasi është formë e pastër bullizmi diplomatik, ka thënë ai. Berisha  këmbëngul se Sekretari Amerikan i Shtetit, Blinken është i dezinformuar nga lobim korruptiv i kryeministrit Edi Rama, sipas Berishës, duke e quajtur një rast unik në të gjithë botën shpalljen ‘non grata’. “Për hir të transparencës të paraqisni në gjykatë ku unë kam ngritur padi për shpifje çdo fakt, provë apo dokument që ju apo cilido individ apo institucion mbi tokë disponon për të faktuar akuzën dhe vendimin tuaj absolutisht pa baza”, shkruan Berisha.