Presidenti Ilir Meta vlerëson se demokracia në Shqipëri është në një situatë më të mirë se sa periudha katastrofike sipas tij para zgjedhjeve të 25 prillit, ndërsa i bëri thirrje opozitës të përmbushë përgjegjësitë e saj në parlament që institucionet e tjera të rimarrin veten dhe të respektojnë Kushtetutën e Shqipërisë. Deklaratën e tij zoti Meta e bëri nga qyteti i Korçës duke folur për disa media. “Situata e demokracisë në vendin tonë është në një gjendje problematike, nuk është siç do të donin shumë përfshi mua, pas 25 prillit, por është shumë më mirë se situata katastrofike para 25 prillit, në kushtet e mungesës së një parlamenti kushtetues e funksional në kushtet e 0 opozitës në gjitha institucionet qendrore të vendit” tha zoti Meta. Presidenti tha se “Mbas 25 prillit janë mundësitë për rivendosjen e plotë të demokracisë për një demokraci funksionale dhe një parlament funksional. Ky është qëllimi ynë kryesor që demokracia të funksionojë që premtimet e atyre që votohen të mbahen” tha ai.
Deklaratat e tij kreu i shtetit i bëri pas një ceremonie për vlerësimit të katër të përndjekurve politikë, simbole të rezistencës antikomuniste në Korçë.