Ambasadorja amerikane në Tiranë Yuri Kim, ka shprehur besimin se prokurorët e SPAK-ut  do të ndjekin penalisht dhe do bëjnë përgjegjës ata që dëmtojnë shqiptarët dhe pasurojnë vetveten përmes krimit të organizuar dhe korrupsionit. Deklaratën e saj ambasadorja e bëri gjatë një takimi me 15 prokurorët e strukturës së posaçme antikorrupsion, për t’iu shprehur vlerësimin për punën e palodhur në ekip dhe ndjekjet penale të shumta të suksesshme. “Është lajm i mirë për Shqipërinë që klasa e parë e hetuesve të BKH po iu bashkohet atyre në luftën kundër krimit dhe korrupsionit. Klasa e BKH me 28 hetues të përkushtuar dhe të trajnuar mirë do të sigurojë ndërtimin e çështjeve të forta nga SPAK. Së bashku, ata do u japin përparësi dhe fokus çështjeve më të rëndësishme dhe do modelojnë pavarësi dhe përgjegjshmëri. Së bashku, ata do të ndjekin penalisht dhe do bëjnë përgjegjës ata që dëmtojnë shqiptarët dhe pasurojnë vetveten përmes krimit të organizuar dhe korrupsionit” tha zonja Kim. “Askush nuk është mbi ligjin! Koha e pandëshkueshmërisë po merr fund!” tha ambasadorja amerikane në Tiranë.