Presidenti Vuçiç bëri të ditur se do i dërgojë një letër NATO-s lidhur me deklaratën e KFOR-it se nuk do të lejojë barrikadat në veri të Kosovës. Sipas Vuçiç kërcënimi i lirisë në veri nuk janë barrikadat, por qeveria që kërkon t’u vendos serbëve vizë për të shkuar në shtëpitë e tyre.

Vuçiç tha se letrën do ta dërgojë pas bisedimeve të ardhshme me ndërmjetësuesit e BE-së dhe SHBA-së, Miroslav Lajçak dhe Gabriel Escobar, dhe se Serbia e interpreton ndryshe rolin e KFOR-it dhe NATO-s.

“Qëllimi juaj duhet të jetë mbrojtja e popullatës serbe, ata janë minoritet. Pse po i ndihmoni shqiptarët që të shtypin këtë minoritet. Pse, së bashku me shqiptarët po keqtrajtoni serbët, a është detyra juaj apo jo që të ndihmoni serbët”, tha Vuçiç.

KFOR-i ka deklaruar se nuk do të lejojnë barrikada në rrugët në Kosovë dhe se ky mision është i gatshëm të ndërhyjë nëse rrezikohet stabiliteti në Kosovë.

Tensionet në veri të Kosovës nisën me vendosjen e reciprociteti të targave dhe dokumenteve serbe, vendim që u shty për t’u zbatuar më 1 shtator. Gjatë këtyre ditëve SHBA dhe BE përmes përfaqësuesve të tyre kanë zhvilluar takime me liderët e Serbisë dhe Kosovës për të arritur një kompromis për situatën.

/rtsh.al/