Për të katërtën ditë radhazi protestuesit kanë mbushur rrugët e Shkupit për të kundërshtuar propozimin francez. Gjatë protestës së të martës ka patur tensionim të situatës, ku protestuesit kanë thyer xhamat e ministrisë së Jashtme dhe kanë hedhur në drejtim të saj mjete piroteknike. Si pasojë e dhunës janë lënduar 4 efektivë.

Ashtu si ditët e tjera, protesta ka nisur para Kryeministrisë dhe më pas është spostuar në Ministrinë e Jashtme. Aktualisht protestuesit i janë drejtuar Kuvendit dhe po qëndorjnë para godinës së saj.

Protesta në Shkup

Propozimi francez adreson zgjidhjen e mosmarrëveshjeve mes Bullgarisë dhe Maqedonisë së Veriut lidhur me gjuhën dhe historinë. Adresimi i këtyre problematikave do t’i hapte rrugën Shkupit për nisjen e negociatave me BE.

Por protestuesit në Shkup kundërshtojnë propozimin e Macronit për heqjen e vetos bullgare, pasi pretendojnë se propozimi francez lejon “bullgarizimin” e Maqedonisë së Veriut dhe nuk  njeh as gjuhën e as historinë maqedonase.

Gjatë ditës së sotme kreu i Këshillit të Evropës, Charles Michel tha nga Shkupi se pranimi i propozimit francez do të hapte negociatat, ndërsa kryeministri i Maqedonisë së Veriut, Dimitar Kovaçevski tha se ky propozim njeh gjuhën e pastër maqedonase, ndërsa tha se protestat e dhunshme nuk i kanë hije një vendi që aspiron të hyjë në BE.

Protesta në Shkup

/rtsh.al/