“Është e rëndësishme që të dyja palët ta kuptojnë se, nëse ndodh ndonjë trazirë në veri, kjo nënkupton përballje me NATO-n”.

Ky ka qenë paralajmërimi i Ndihmëssekretarit amerikan të Shtetit për Çështje Evropiane dhe Euroaziatike, James O’Brien për Kosovën dhe Serbinë, gjatë një bashkëbisedimi me gazetarë.

O’Brien po ashtu ka theksuar se veriu i Kosovës duhet të jetë i qetë dhe i sigurt në mënyrë që dy vendet të shënojnë përparim politik në rrugën e tyre drejt Bashkimit Evropian.

Më 5 tetor, Senati amerikan, ka konfirmuar emërimin e James O’Brien si Ndihmës Sekretar i Shtetit për Evropën dhe Euroazinë.

Për emërimin e O’Brien votuan 67 senatorë, ndërsa kundër 31 senatorë, njoftoi Senati, transmeton Al Jazeera .

Ndihmës Sekretari i Shtetit për Evropën dhe Euroazinë kryeson Byronë e Çështjeve Evropiane dhe Euroaziatike.

Kësisoj i dërguari special i Shteteve të Bashkuara të Amerikës për Ballkanin Perëndimor, Gabriel Escobar, i cili aktualisht është diplomati më i angazhuar amerikan kur bëhet fjalë për dialogun ndërmjet Kosovës dhe Serbisë, do t’i raportojë O’Brien, nga 5 nëntori i këtij viti.

O’Brien ishte propozuar nga presidenti i Shteteve të Bashkuara të Amerikës, Joe Biden, për ta marrë pozitën e Ndihmës Sekretarit të Shtetit për Çështjet Evropiane dhe Euroaziatike.

Diplomati amerikan ka shërbyer si Shef i Zyrës së Koordinimit të Sanksioneve, me gradën Ambasador në Departamentin e Shtetit, post të cilin e mban që nga viti 2022.

Ai më parë kishte shërbyer edhe në dy administrata amerikane si i dërguar special presidencial.

Po ashtu O’Brien shërbeu edhe si Këshilltar i Lartë i ish-Sekretares Madeleine Albright dhe Zëvendës Drejtor kryesor për Planifikimin e Politikave dhe i Dërguar Presidencial për Ballkanin.

Ai ishte pjesë e delegacionit amerikan gjatë negociatave në Rambuje në vitin 1999.

Përveç kësaj, O’Brien u përfshi në gjetjen e një zgjidhjeje për t’i dhënë fund luftës në Bosnje dhe Hercegovinë dhe ndihmoi në formulimin e Marrëveshjes së Dejtonit të vitit 1995, e cila i dha fund asaj lufte./REL/

/rtsh.al/