Rreth 150 vizita në ditë po përballohen nga urgjenca e Spitalit të Shkodrës. Fluksi  është shtuar javët e fundit ku për shkak të rikonstruksionit të spitalit të Lezhës, pacientët dërgohen në spitalin e Shkodrës.

Egir Lezha, zv/drejtori i spitalit bën me dijë masat e marra për të përballuar fluksin e shtuar

“Në bazë të udhëzimit të Ministrisë kemi marrë të gjitha masat e duhura që shërbimet ndaj pacientëve në të gjitha specialitetet të jenë në maksimum. Kemi marrë masa për shtim të materialeve të mjekimit, barna, ilaçe, materiale laboratorike që të përballojmë këtë fluks të shtuar”, u shpreh Lezha.

Gjatë orëve të mëngjesit fluksi është më i shtuar. Për këtë Lezha apelon drejt qytetarëve që vizitat e para t’i kryejnë pranë sistemit parësor shëndetësor

“Bëjmë apel për qytetarët që përveç shërbimit të urgjencës janë edhe shërbimet ambulatore, mjekët e familjes, vizitat që kryhen atje dhe nuk kanë nevojë për shërbimin e urgjencës të menaxhohen nga mjekët e familjes kur nuk ka nevoja urgjence. Rastet me komplikacione normale që shërbimi i urgjencës është 24 orë në funksion të tyre”, theksoi Lezha.

Prej disa javësh spitali i Lezhës po i nënshtrohet rikonstruksionit duke patur funksionin të pjesshëm .Për rastet që kanë nevojë për ekzaminime të mëtejshme pacientët e marrin këtë shërbim në Shkodër. Drejtuesit e spitalit rajonal Shkodër thonë se ky fluks po menaxhohet nga ana e bluzave të bardha.

Gazetare: M. Gjoni

/rtsh/