Ishte nëntori i vitit 1923, kur për herë të parë në ambientet e kishës së “Shën Llezhdrit” në Selitë të Mirditës, hapi dyert shkolla e parë shqipe. Për mësimin e fëmijëve të zonës dhe fshatrave përreth u kujdes famulltari  Dom Vlash Muça. Sot pas plot një shekulli rrugëtim në fushën e dijes, shkolla 9-vjeçare “Bajram Curri” feston 100-vjetorin e saj.

“Kjo shkollë ka emrin Bajram Curri, ai ishte mik i Selitës dhe Selita e mbrojti atë në ato ditë të vështira kur hidheshin themelet e shtetit shqiptar”, u shpreh ish-mesuesi Mark Pergjini.

Drejtori i Zyrës Vendore të Arsimit Para universitar Renuar Kola dhe Kryebashkiaku i Mirditës Albert Mëlyshi, vlerësuan kontribuesit ndër breza.

“100 vjet nuk janë shumë në historinë e një vendi, por për malet tona hapja e një shkolle pas qindra vitesh në analfabetizëm ishte një rreze drite për të ndryshuar rrugën e njerëzve”, tha drejtori i ZVAP  Renuar Kola.

Në përvjetorin jubile të shkollës së parë shqipe në Selitë u vlerësuan me certifikata mirënjohje disa nga ish-mësuesit dhe ish-nxënësit që dhanë kontribut në këtë institucion arsimor.

/RTSH/