Në Bruksel ekipet shqiptare po përvijojnë takimet me zyrtar=t e BE për përafrimin e legjislacionit shqiptar me atë europian.

Të premten, Komisioni Evropian dhe delegacioni shqiptar zhvilluan në Bruksel takimin bilateral për Kapitullin 28: “Mbrojtja e konsumatorit dhe shëndetit publik”.

Gjatë raportimit në KE, ekspertët e Ministrisë së Financave dhe Ekonomisë shpjeguan se, tashmë është hartuar Strategjia e Mbrojtjes së Konsumatorëve dhe Mbikëqyrjes së Tregut 2023-2030, që do të shërbejë për të identifikuar të gjithë treguesit e mbrojtjes së konsumatorit që mungojnë, ose që duhet të forcohen, në kuadër të procesit të integrimit evropian dhe detyrimeve që rrjedhin nga nënshkrimi i MSA-së.

Shtyllat kryesore ku do të mbështetet kjo strategji janë: siguria e produkteve ushqimore dhe joushqimore; barnat për përdorim njerëzor; kozmetika; fusha e infrastrukturës së cilësisë; mbikëqyrja e tregut; etj.

Çështje të mbrojtjes së konsumatorëve që nuk kanë lidhje me aspektet e sigurisë si: mbrojtja e konsumatorëve, sa i përket praktikave tregtare; zbatimi i të drejtave të konsumatorëve; zgjidhja alternative dhe online e mosmarrëveshjeve; mjedisi; turizmi; digjitalizimi, etj.